Google ka përfunduar një përditësim të gjerë të imazheve të Street View në Shqipëri, duke sjellë fotografi të reja dhe me rezolucion të lartë nga qytetet, rrugët, destinacionet turistike dhe zonat natyrore në të gjithë vendin.

Përditësimi është pjesë e një nisme më të gjerë që përfshin Shqipërinë, Malin e Zi, Maqedoninë e Veriut dhe Serbinë, ku automjetet e Google Street View kanë përshkuar mbi 103 mijë kilometra për të mbledhur imazhe të përditësuara, për të zgjeruar mbulimin dhe për të përmirësuar cilësinë e informacionit të disponueshëm në Google Maps.

Street View u mundëson përdoruesve të eksplorojnë virtualisht vende të ndryshme përmes imazheve panoramike 360 gradë, duke ndihmuar në orientimin, planifikimin e udhëtimeve dhe zbulimin e destinacioneve të reja.

Në Shqipëri, përditësimi përfshin qendrat urbane kryesore si: Tirana, Durrësi dhe Vlora, si edhe disa prej atraksioneve më të njohura turistike dhe kulturore të vendit. Përdoruesit mund të eksplorojnë virtualisht rrugët dhe sheshet e kryeqytetit, bregdetin e Adriatikut dhe Jonit, si dhe trashëgiminë kulturore të qytetit të Beratit, pjesë e listës së Trashëgimisë Botërore të UNESCO-s.

Ndër destinacionet natyrore të përfshira në përditësim është edhe Syri i Kaltër, një nga monumentet më të njohura natyrore të Shqipërisë, i cili tashmë mund të vizitohet virtualisht me imazhe të reja dhe më të detajuara.

Përditësimi i Street View pritet të sjellë përfitime të rëndësishme për sektorin e turizmit, duke ndihmuar vizitorët vendas dhe ndërkombëtarë të planifikojnë më mirë udhëtimet e tyre dhe të zbulojnë destinacione të reja përpara se t’i vizitojnë fizikisht. Gjithashtu, bizneset lokale do të përfitojnë nga një paraqitje më e saktë dhe më e përditësuar në Google Maps, platforma që përdoret çdo ditë nga miliona njerëz në mbarë botën.

Shqipëria ka përjetuar një rritje të ndjeshme të turizmit gjatë viteve të fundit dhe mjetet digjitale luajnë një rol gjithnjë e më të rëndësishëm në mënyrën se si vizitorët zgjedhin, planifikojnë dhe përjetojnë destinacionet e tyre.

Përmes imazheve të reja të Street View, Google synon të ofrojë një pasqyrë më të saktë të transformimeve urbane, zhvillimeve infrastrukturore dhe pasurive natyrore e kulturore të vendit. ë shumë informacion rreth Street View është i disponueshëm në: https://www.google.com/streetview/ . Më shumë informacion rreth Politikës së Privatësisë së Google mund të gjeni në: https://policies.google.com/privacy.

Rreth Google Street View

Google Street View është një funksion i Google Maps dhe Google Earth që ofron imazhe panoramike 360 gradë të rrugëve, qyteteve dhe pikave të interesit në mbarë botën. Shërbimi ndihmon përdoruesit të eksplorojnë vende, të planifikojnë itinerare dhe të orientohen më lehtë në mjedise të ndryshme, duke ofruar një përvojë vizuale të detajuar dhe të përditësuar.